Kua whati te rekoata moo te tokomaha o ngaa kaihoe ka tae atu ki te moana o Karaapiro moo te Whakataetae Waka Ama aa-Motu 2026.
Kua poowhiritia e ngaa maangai o te iwi mana whenua, a Ngaati Korokii Kahukura, me Waka Ama Aotearoa ngaa kaihoe e 4,610 me te tini o ngaa kaitautoko me ngaa kaitaunaki o ngaa karapuu.
E ai ki a Lara Collins, te Kaiwhakahaere Maatua o Waka Ama Aotearoa, i eke ngaa nama reehita ki te 4,610, he 800 te pikinga atu i te tau o mua atu me toona harikoa kei te piki haere te haakinakina nei.
Ko Ngaati Korokii Kahukura te hau kaainga kua tohunga ki ngaa mahi manaaki i te tini me te mano ka whakaeke ki runga i a raatou ia tau, ia tau.
“He tino harikoa naa te mea ko teenei tau, ko te tau nunui rawa ngaa taangata ka tae mai,” e ai ki a Lee Ann Muntz o Ngaati Korokii Kahukura.
“Ka tiaki manuwhiri, ko ngaa tuunga waka hoki moo teenei wiki. Noo reira, ka tautoko i te marea ka tae mai noo ngaa pito o te motu,” hei taana anō.
Ahakoa te pikinga o ngaa nama, koo te aronga nui ki te whakapakari i ngaa wheeako me nga tukanga ki te manaaki i te marea.
I akiaki a Zalene Douglas, Meema Poorari o Waka Ama Aotearoa, kia manaaki ngaa taangata i a raatou anoo, kia paarekareka hoki te kaupapa:
“Koo taku akiaki kia kooa te taangata, kia atawhai ki eetahi atu, kia harikoa i runga i te wai, eengari kia whai hoa ki waho o te wai hoki,” hei ai ki a Zalene Douglas Mema Poari o Waka Ama Aotearoa.
“He hui nui teenei, ee hiahia ana maatou kia ngahau raatou, kia pai te wheeako Waka Ama kia tupu tonu ai te haakinakiina,” hei taana.