Kua rite te kapa o Ngā Kura Kaupapa Māori o Te Puku o Te Ika ki te piki anō ki te papa tūwaewae i te whakataetae Kapa Haka Kura Tuarua a motu, me te wawata nui kia pupuri tonu i tō rātou taitara Toa Whakaihuwaka. I te rā nei pōwhiritia ai ko ngā kapa haka Kura Tuarua katoa ki Bay Park Arena e ngā iwi o Tauranga Moana.
E ai ki te Kaitātaki Wahine a Te Ahu Paenga, ko te kaupapa o tēnei terenga he nui atu i te wikitoria. “Ko tōku tūmanako mō tēnei terenga a mātou, kia whakaputaina tō mātou karere ki te ao, tō mātou karere ka kawea ki te papa tūwaewae anō hoki,” hei tā Te Ahu.
“Ki au nei, ko te tūhonohono a i a kura, a i a kura, a i a tamaiti anō hoki. Ka karanga mai i ērā uri ō roto o Te Arawa, ā, ka hoki mai ki te kāinga anō hoki,” hei tāna anō.
I te Whakataetae ā-Motu 2024 ka Toa Whakaihuwaka ko Ngā Kura Kaupapa Māori o Te Puku o Te Ika, arā ko Te Kura Kaupapa Māori o Ruamatā, Te Kura Kōkiri me Te Kura Kaupapa Māori o Whakarewa i te reo ki Tūwharetoa.
Ko te aroha te pou tokomanawa e kawea ana e te kapa i tēnei tau. E ai ki te kaihaka a Rewi Bryant, “Ko te aroha te mea nui o roto i tō mātou kapa, ko ngā tikanga anō hoki, a mātāpono, te ao matua,” hei tā Rewi.
“He nui te whakawhanaungatanga o roto, i roto i tō mātou kapa, ngā Kura Kaupapa Māori o Te Puku… e kite ana, nuitia te tuakana me te teina o roto, nō reira he tūmomo hononga ki te ngākau me kī,” hei tāna anō.
Ko Te Rauotehuia Pou tētehi o ngā kaiako he Raukura anō hoki o te kapa hei tana,”te noho whakaiti, nā ko te whakanui i te kaupapa o ngā whakataetae, te whakarangatira, te whakataetae mō te taiao atu, me te aha? Kia pukumahi i roto i ērā mahi. Yeah, te whakarangatira i te whakataetae, koirā pea te aronga nui.”
I te tautoko i tēnei whakaaro, i kōrero te kaiako a Ramari Sherman mō te hōnore o te eke ki tēnei taumata. “Ki a au nei, ko te reo te take, ko Te Aho Matua te take, ko tō rātou whakatinana i ngā kupu me te mārama hoki ki ngā kaupapa i kawea e rātou. Ko te pono ki ngā kaupapa o ngā waiata, o ngā haka,” hei tā Sherman.
“Ko ngā wawata mō tēnei kapa i tēnei terenga, kia tū rangatira mai rātou ki te papatūwaewae, ki te whakamana i te hōtaka, i ngā kaupapa e kawea ana i te hōtaka, kia rongo te marea i tō mātou, Te Aho Matuatanga, kia whakatenatena i te iwi, kia kotahi mai.”
Ka tū te Kapa haka o Ngā Kura Kaupapa Māori o Te Puku o Te Ika hei te 4:15PM, Wenerei 1 o Hūrae. Ka tāea te mātaki me te whakarongo i runga i ngā paepāho o Moana Radio: 98.2FM, 1440AM rānei mā te taupānga o Whare Kōrero rānei.