Kua tīmata te wānanga o Te Reo ā Tū, e rua ngā rā te roa, ki Rotorua, ki te whakanui i te mātauranga o te mau rākau, e kawe ana i ngā kairākau, kaihaka, rangatahi, me ngā ākonga o Aotearoa ki raro i te tuanui kotahi. Ko te kaupapa matua kia tū kaha tonu te toi o te mau rākau i roto i te ao hurihuri.
Hei tā Wetini Mitai-Ngatai, te Tohunga Mau Rākau, he mea nui te āhua o te tū ki te ao whānui me te kore e whakarere i ngā akoranga tuku iho:
“Me pēnei te kōrero. Ko ō tohunga ake, puritia ērā akoranga, engari titiro puta noa i te ao whānui, kia tāea e koe te tū ōrite, kia tū kaha tonu i roto i te ao whānui, ahakoa haere ki hea.”
I kōrero anō a Wetini i tōna hōhonutanga ki te kaupapa mau rākau, me tana maumaharatanga ki tōna pāpā, ki a Te Irirangi, he kaiako nui ki a ia: “Kāore i nui aku kōrero, ahakoa i pai ki a rātou. He kōrero noa iho i ētahi tauira i tuku atu mō te āhuatanga o taku pāpā a Te Irirangi. Tōna nei āhua, tōna pai, ōna pūmanawa, tōna ruku hohonu ki te puna mātauranga o te taha rangatira.”
I kī a Wetini he tino pai te kite i te kotahitanga o ngā whare tū tauā, e hāpai ana i te whakawhitiwhitinga kōrero me ngā whakaaro: “He tino pai rawa atu tērā te kite i te kotahitanga o ngā whare tū tauā. He akoranga i roto i ngā whakawhitiwhitinga kōrero, whakawhitiwhitinga whakaaro. Kei reira, koinā te mea e whai wāhi mai ana, whai wāhi atu ana.”
Nā Renata rāua ko Tukiterangi Curtis te wānanga nei i tīmata. I kōrero a Renata Curtis, te Kaiwhakahaere o Te Reo ā Tū, mō te orokohanga o te hui me tōna kōkiritanga:
“I whakatūngia tētahi hui ki ngā pou, ki ngā ruanuku o ngā whare tū tauā o Aotearoa, arā, i roto i tērā i kohi pūtea. I waimarie i ētahi pūtea, arā, i whakatū tēnei hui hei tuatahitanga.”
I whakanuia anō e Curtis te manako kia haereere te mauri o te hui puta noa i te motu, hei tautoko i te oranga tonutanga o te mau rākau:
“Ko te manako, ka mutu tēnei hui, ka hoatu te mauri ki tētahi atu rohe e whakahaere i tēnei hui haere ake nei te wā.” I tua atu, “Ko tā mātou o Te Arawa, kaua e pupuri ki konei. Me huri haere, kia kite atu hoki ngā whare tū tauā i ngā āhuatanga eke, e puāwai ai te māramatanga.”
E ai ki a Curtis, he waimarie rātou i tae mai ngā whare tū tauā, nā te mea e kite ana rātou i te hua mō te oranga tonutanga o te mahi a ō rātou tūpuna: “He waimarie mātou i whai whakaaro ngā whare tū tauā kia tae mai. E kite hoki rātou i ngā hua kei roto mō te oranga tonutanga o tēnei mahi a ō tātou tūpuna.”