“E koa ana te ngaakau, kua tau te tokoono o Tainui Waka hei kanohi moo too taatou Arikinui ki Te Matatini,” hei taa Hira Hona, kaitaataki taane moo Te Pou o Mangataawhiri.
E rima hoki ngaa kapa ka whai i Te Pou o Mangataawhiri, hei whakakanohi i a Waikato ki Taakiri Tuu Te Matatini 2027. Ko Te Iti Kahurangi, ko Te Kapa Haka o Aawhina i te Kaupapa, ko Te Haona Kaha, Ko Mootai Tangata Rau me Ngaa Pua o Te Koowhara.
E ai ki a Hona, kua tutuki noa iho i te waahanga tuatahi o te kaupapa nei.
“E rua ngaa waahanga ki teenei kaupapa. Kua tutuki te waahanga tuatahi, anaa, ko te waahanga tuarua, anaa ko Te Matatini. Heoi anoo, e rua hoki ngaa kaupapa i konaa. Teetehi ki te manaaki i te iwi me ngaa iwi o te motu e whakaeke mai ana, anoo hoki ko te pakanga ki runga i te atamira,” hei taa Hona anoo.
He reo poowhiri ki ngaa iwi o te motu.
Maa Waikato e whakahaere, e manaaki hoki i te kaupapa o Te Matatini 2027, e kiia nei ko ‘Taakiri tuu Te Matatini’ ka tuu ki Hopuhopu.
“He mea tiki atu teeraa i ngaa kupu oohaakii o too taatou Kiingi, a Kiingi Tuuheitia me oona koorero, taakiri tuu te kotahitanga, taakiri tuu te mana motuhake. Anaa, aa teeraa tau, taakiri tuu Te Matatini,” hei taa Hona anoo.