Atu i Hautapu i Kemureti, e whakamaanawa ngaatahi ana te kamupene miiraka kau nui rawa o Aotearoa, a Fonterra me ngaa iwi manawhenua a Ngaati Korokii Kahukura me Ngaati Hauaa i Te Maatahi o te Tau.
He tuatahitanga teenei moo te kamupene Fonterra ki te whakanui i a Matariki ki teetehi hautapu. I te ata nei, ka huraina he pou whakairo hou ko ‘Wai Ora, Wai Mate’ hei kaitiaki moo te wheketere o Hautapu.
“Ko te kaupapa matua, ko te huranga, ko te whakarewa i too taatou pou. Ka tuu teenei pou hei tohu i ngaa uara o te kawenata i mokohia e Te Maataapuna me ngaa mana whenua o konei anoo hoki,” hei taa te Kaiwhakahaere Rautaki Maaori o Te Maataapuna, a Tana Luke.
“I toko ake te whakaaro i runga anoo i te waahanga hirahira o te tau, kia hautapu anoo hoki taatou i te ata nei. E mihi kau ana ki ngaa mana o konei e aarahi nei i a taatou i roto i eenei aahuatanga i te ata nei,” hei taana anoo.
“Waimarie maatou o Te Maataapuna, he tuatahitanga teenei moo te nuinga o aa maatou kaimahi o konei anoo hoki. Maarakerake ana te kite i ngaa hua o Matariki Herenga Tangata i te ata nei.”
He rahi ake i te kotahi raungaa taangata i tae ake ki te kaupapa whakamaanawa i a Matariki mai i ngaa kaimahi o Fonterra, ki ngaa mema o ngaa iwi manawhenua me te hapori anoo hoki.
“Ko te wai mate, ko te wai ora te kaupapa e paa ana ki te pou. Kei konei ngaa kaupapa infrastructure. Ki teenei tahao too taatou nei whare nei, ko te wai mahea. Ko te wai mahea te ingoa o te wastewater treatment plant. Noo reira ko te kaupapa kee, kia kino kino haere te wai, aa, kia puaawai te ora,” e ki te Pou Taiao o Ngaati Hauaa, a Norman Hill.
“Kei konei a Ngaati Hauaa, kei konei hoki a Ngaati Korokii Kahukura. Maa maatou nei e arataki, hei tiaki i teenei kaupapa o te Matariki o teenei waa whakahirahira moo ngaa kaupapa o too taatou nei ao Maaori,” hei taa Norman anoo.
“He waahi pai, he waahi whakaharahara moo ngaa mana whenua ki teenei o ngaa kamupene, ko Fonterra kia mahi i ngaa mahi hei painga moo te kaupapa Matariki, aa, ko te hautapu kee te kaupapa o teenei waa.”