Kua poowhiritia e Waahi Paa ngaa iwi o te motu ki te whakanui i te rima tekau ma iwa tau o too raatou Poukai i te raa nei.
“Ko te kaupapa matua i te raa nei, he hokinga mahara ki teeraa o ngaa Kiingi, ki a Kiingi Korokii, te whakanui i tana raa Koroneihana i teenei raa me te mea hoki, e whakanui ana i te 59 tau taatou e whakahaere nei i eenei kaupapa,” hei taa Epiha Muru-Kete, o Waahi Paa.
“Ka tuu te waahanga ki too taatou paapaa, ki a Rahui, maana ngaa koorero moo ngaa aahuatanga o roto mai i te Kiingitanga, he paanui noa iho ki te iwi e aha ana taatou moo ngaa kaupapa kei mua noa i te aroaro. Ka rua, e koorero ana te waahanga naa Te Arikinui te koorero ‘Uri o te raupatu, toa o te rauora’. Anei e koorerohia i ngaa aahuatanga rauora e mahi nei maatou i runga i too taatou marae. Koia te kaupapa tuatahi o te marae ake nei,” hei taa Muru-Kete anoo.
Ko taa teenei Poukai, hei whakamahara i te raa Koroneihana o Kiingi Korokii. E ai ki a Muru-Kete, he nui ngaa kaupapa ka whakawhaarikihia ki te waahanga moo ngaa take o te waa o te Poukai nei.
Ehakee i te mea, koiraa anake ngaa kaupapa ka whakawhaarikihia ki te Poukai nei, aa, he waahanga kua whakaritea moo ngaa toorangapuu aa iwi, aa motu anoo hoki.
“Ka toru, ko te waahanga ki Te Whakakitenga me Te Arataura. Ka koorerohia ko wai oo taatou rangatira e aarahi nei i too taatou iwi. Ka mutu, ka tuku te waahanga ki a Kingi raaua ko Hana moo te aahuatanga ki te ao toorangapuu,” hei taa Muru-Kete anoo.
Kua waiho maa ngaa uri o Waahi Paa e whakahaerehia i ngaa whakaritenga moo te Poukai nei.
“Me mihi. Me mihi au ki te hunga ka tae mai i teenei raa ki te whakatutuki i too taatou Poukai. Teenei raa te mihi ki a taatou katoa.”