I te rā nei, i pōwhiritia e Te Puni Kōkiri me te Kawanatanga i a Dion Tuuta hei Tumu Whakarae hou mō Te Puni Kōkiri. He rā whakahirahira tēnei mō te tari, ā, i tae atu tana whānau me ngā iwi o Taranaki ki te tautoko i a ia i tana rā tuatahi ki tēnei tūranga.
“Kua harikoakoa nē, kua koa nā te mea kua riro i a Dion tēnei turanga, he tangata pono he tangata u ki te kaupapa, hei kōkiri i ngā tumanako me ngā wawata o te iwi Māori o te ao Māori kia eke ki te taumata e tika ana,” hei tā Jamie Tuuta. “Kua kitea nei kua tae mai tana matua iwi o te maunga Taranaki ki te tautoko i a ia,” hei tāna.
I kōrero anō te Minita Whanake Māori, a Tama Potaka, mō te tukanga whiriwhiri i a Dion hei kaiārahi, me ngā wero e pīkau ana i a ia. “Ehara nāku i tohu, nā te Tumu Kaimahi o Te Kawa Mataaho Sir Brian Roche hoki i whiriwhiri i a Dion hei tangata marohirohi mo tēnei tauranga, engari nāku anō i tautoko, na te kapinata hoki i whakarewa,” hei tā te Minita.
“He manuka takoto nui kei mua i te aroaro o te tangata, tuatahi ko te rahinga me te matatorutanga o te pūtea kei wahi kē, iti iho i te 0.5 paiheneti o te pūtea ka tau ki Te Puni Kokiri,” hei tāna anō.
I te wā i tū ai a Dion ki te whakahoki i te kupu, i whakapuakina e ia tana mihi ki te tautoko i whakawhiwhia ki a ia. “Kua ki taku ngakau ki te aroha mai i ōku whanaunga me ōku iwi me o ratou tautoko ki ahau i tēnei rā, i tēnei rā tuatahi i tēnei tūranga hou,” hei tāna.
I te mutunga o tana kōrero, i whakatakoto a Dion i tana tirohanga mō te kaupapa matua o Te Puni Kōkiri i raro i tana kaihautūtanga. “Ko te tino kaupapa o Te Puni Kokiri hei hāpai i a ngāi Māori me te Karauna hoki.”
